នៅសប្តាហ៍នេះទស្សនិកជននឹងទទួលបានអារម្មណ៍ភ្ញាក់ផ្អើលជាមួយវត្តមានរបស់តារាចម្រៀងដែលអញ្ជើញមកចូលរួមនៅសប្តាហ៍នេះ។ ជារៀងរាល់សប្តាហ៍ ទស្សនិកជនតែងតែជួបជាមួយនឹងវត្តមានតារាចម្រៀងកម្ពុជា បកស្រាយបទចម្រៀងពីរោះៗអមទៅដោយភ្លេងបែប Acoustic។ ប៉ុន្តែនៅសប្តាហ៍នេះនឹងមានវត្តមានតារាចម្រៀងបរទេសមួយរូប ប៉ុន្តែកំពុងតែទទួលបានប្រជាប្រិយភាពខ្លាំងគួរសមពីហ្វេនៗកម្ពុជា នោះគឺកញ្ញា ហ៊ូអ៊ីន ហ្វាង។ កញ្ញា នឹងបកស្រាយបទចម្រៀងជាភាសាកូរ៉េ ភាសាអង់គ្លេស ហើយជាពិសេសអាចបកស្រាយបទចម្រៀងជាភាសាខ្មែរបានយ៉ាងពីរោះទៀតផង។ 

រីឯតារាច្រៀងកម្ពុជាដែលនឹងមកបង្ហាញវត្តមានរួមគ្នាជាមួយកញ្ញា ហ៊ូអ៊ីន គឺលោក សេង ផានិត។ ទស្សនិកជនដែលគាំទ្រលោក ផានិត ច្បាស់ជាដឹងហើយថាលោកអាចបកស្រាយបទចម្រៀងជាតិ និងបទចម្រៀងជាភាសាអង់គ្លេស បានយ៉ាងពីរោះ 
ស្តាប់ហើយចង់ស្តាប់ទៀត គួបផ្សំជាមួយនឹងការតុបតែងខ្លួនរបស់លោកបែបឃ្យូតៗស្ទាយយុវវ័យទៀតនោះ កាន់តែធ្វើអោយហ្វេនៗទទួលបាននូវអារម្មណ៍ថ្មី ប្លែកចំពោះរូបលោក។ តារាកិត្តិយសច្រៀងពីរោះហើយ គួបផ្សំនិងការសំណេះសំណាលពិសេសជាមួយនិងពិធីការនីរួបស្រស់ វោហារស័ព្ទមិនចេះរីងស្ងួតកញ្ញា ពេជ្រ ចាន់ធីតា ទៀតនោះ កាន់តែធ្វើអោយកម្មវិធីពោរពេញទៅដោយភាពរីករាយរយៈពេលមួយម៉ោងពេញតែម្តង។ 

កុំភ្លេចណា! ចង់ស្តាប់ការបកស្រាយបទចម្រៀងពីរោះៗពីសំណាក់តារាចម្រៀងទាំងពីរដួងខាងលើ កុំភ្លេចរង់ចាំតាមដានទស្សនាកម្មវីធី CAMBODIA LITE Station ចាក់ផ្សាយនៅលើកញ្ចក់ទូរទស្សន៍ភីអិនអិន រៀងរាល់ថ្ងៃអាទិត្យ ចាប់ពីម៉ោង ៥ល្ងាចតទៅ៕ 
 

ដោយ៖ ម៉ី វ៉ាន់ណែត