នៅសប្តាហ៍ថ្មីនេះ ពីតន្ត្រី KIZZ Concert នឹងនាំអារម្មណ៍ទស្សនិកជនទៅជួបជាមួយតារាចម្រៀង ល្បីៗបួនដួងរួមមាន លោក ឆន សុវណ្ណារាជ កញ្ញា ប៉ាច គីមមួយ លោក សយ រតនៈ និង លោក សឿន ខិនចាន់តារា ។ វត្តមានតារាចម្រៀងទាំងបួនដួងនេះ នឹងមិនធ្វើអោយទស្សនិកជន និងហ្វេនៗខកបំណងឡើយ ព្រោះពួកគាតនឹងលើកយកបទចម្រៀងពីរោះៗ បទចម្រៀងដែលស្តាប់ហើយមិនចេញជិនណាយ មានទាំងបទចម្រៀងមនោសញ្ចេតនា និងបទញាក់កន្ត្រាក់អារម្មណ៍ អង្រួនបេះដូងហ្វេនៗតែម្តង។ 

អ្វីដែលកាន់តែពិសេសទៀតនោះ តន្ត្រី KIZZ Concert ក៏នៅតែបើកឱកាសអោយអ្នកទស្សនាដែលមានទេពកោសល្យសិល្បៈ មកបង្ហាញសមត្ថភាពផងដែរ។ រៀងរាល់ខែនឹងមានបេក្ខភាពមកបង្ហាញសមត្ថភាព ហើយមានឱកាសច្រៀងរួមគ្នាដោយផ្ទាល់ជាមួយតារាចម្រៀងអាជីព ហើយការប្រកាសស្វែងរកនិងជ្រើសរើសបេក្ខភាពមានសមត្ថភាពនឹងធ្វើឡើងតាមរយៈផ្ញើវីដេអូឃ្លីបសម្តែងរបស់សាម៉ីខ្លួនចូលមកប្រអប់សារទំព័រហ្វេសប៊ុក PNN TV Cambodia និងទំព័រហ្វេសប៊ុក KIZZ។ រៀងរាល់ខែក្រុមការងារផលិតកម្មវិធីនឹងជ្រើសយកបេក្ខភាព ៥ រូប ដើម្បីដាក់អោយបោះឆ្នោតតាមរយៈការបង្ហោះឃ្លីបវីដេអូទាំង៥ នៅលើផេក PNN TV Cambodia ។ បេក្ខភាព ដែលមានការគាំទ្រខ្លាំងជាងគេបំផុត ១រូប ក្នុងចំណោម៥រូប នឹងត្រូវជ្រើសអោយមានឱកាសច្រៀងដោយផ្ទាល់ក្នុងកម្មវិធីប្រគំតន្រ្តី KIZZ Concert ។ KIZZ Concert ផ្សាយផ្ទាល់រៀងរាល់ ថ្ងៃសុក្រ វេលាម៉ោង ១១:០០ ថ្ងៃត្រង់ ដល់ ម៉ោង ១រសៀល នៅលើកញ្ចក់ ទូរទស្សន៍ PNN និង លើហ្វេសប៊ុកផេក KIZZ៕

ដោយ៖ ម៉ី វ៉ាន់ណែត